عدد الرسائل : 177 العمر : 34 تاريخ التسجيل : 28/01/2008
موضوع: في غابات الأمازون(قصة من ثمان فصول) الثلاثاء فبراير 12, 2008 7:03 pm
بسم الله الرحمن الرحيم
سلام على الجميييييع حكومة وشعبا وأحي كل من ساهم في رفع معنويات وخلاني أكون معكم اليوم <<<< عدال ياناصر الفراعنة
على طاري الفراعنة ماتحسون اذبحونا فيه والله هابين فيه البشرية كأن مافي شاعر إلا هو ذكروني الناس يوم انهبلو على مطعم النورس في حارتنا<<<< وش جاب لجاب
نخش في المهم
هذا موضوعي الأول بعد الرجعة المباركة إن شاء الله تعجبكم قصتي وبالمناسبة هذي القصة فازت بجوائز عالمية وابنشرها إن شاء الله في مجلة ماجد <<<< لا يكثر
البدايه قصتي مع خويه راغب علامه بس ماهو راغب المغني اللبناني هذا راغب واحدن من الربع خويي هذا جوكر يعني حطه اي مكان رايح يعجبك عشان كذا كان هو المرشح الأول لطلعتي الفله وبما أن مافيه غيره أصلا.. ففاز معي بالطلعه
الفصل الأول جهزنا الأغراض وخذت العزبه الشاي والقهوة والحليب والزنجبيل وحبك لعيون راغب وبعدين شيكت سيارتي في الورشه طلعت الحمدالله مافي شي بس القير والماكينةخبطت معي بعدين.. المهم ماهمني خربان إلا المكيف..بتقولون ليه !!! لأن المنطقة اللي بأروح لها حاره شوي ويحتاج مكيف عاد أنا مطفر ماعندي إلا التبن قلت اسوي حادث وعلى حساب التأمين ومشت عليهم ومالكم بالطويلة انتهينا من السيارة و بعدها حجزت تذكرة الطيران ذهاب وعودة من خطوط الطيران الخليج لأني سمعت تدعس على الخط وخدماتها كويسه
الفصل الثاني يوم جاء يوم الرحلة اخذت معمول وبسكوت بالقشطة <<< طالع الكورنيش الحبيب ركبت الطياره وجنبي خويي راغب علامه ... اقلعت الطائرة والساعة كانت سته أو عشرة مادري والله بس كان الوقت ظلام ... وفي الطيارة مافي إلا قوة نوم وإذا قمت اشوف مسرحية طارق العلي وأنا على هذي الحاله اليييين ما هبطت الطياره في الديره اللي أنا ابغى اروحلها
الفصل الثالث يوم دخلنا المطارهم قرينا لافتى مكتوب فيها
أهلا بكـــم في بلدكم الثاني
البرازيل
وأنا ماشي ابطلع من المطار واجهت رونالدو قال لي راغب والله أني حاس ابشوفه قلت له ياولد عادي مافي رسميات خلك فرررررري عاد قابلته بوس خشوم ورحب فينا وقال ياهلا والله بالذياب ياهلا ومسهلا والرجل ماقصر والله طلع نشمي عزمنا في بيته وحلف على العشاء قال ذابحن تيس والله لاتقلط . أنا من جهتي عطيته بالوجه قلت له ياخوي احنا جاين لشغله ماحنا فاضين لك وإذا كنت ودك تخدمنا ودنا اللي نبييييه قال ابشر والله طيب وش بغيت ياصنايدي؟ قلت: غابات الأمزون
قال تم
الفصل الرابع يوم طلعنا من المطار الرجال ماقصر جاب لنا كداده من المطار إلى غابات الأمزون وقال الله يستر علييكم ماتشوف شر قلنا الله يلعن وجهك حمار اللي يعتمد عليك ركبنا الكداده وطلع رخيص ماهو غالي ويوم ركبنا الكداده وطلعت كامري 2008 فل كامل فتحه جنود نيكل مع جناح اللون اسود ومغيمها كتم وقال راعيها على وين قلنا إلى الغابات.. ومن يوم مشينا الين وصلنا والرجال مكيييم ماسح الطبلون قلت خفف يمكن ردار شي ماتدري شي قال لي عندي واسطه في أمن الطرق قلت أجل زين وصراحة الطريق ماهوب بعيد مره زي ماتقول من الدمام إلى الرياض بس مكسر وحفريات وتحويلات واجد وبعد كل هذي الأمور وصلنا إلى الغابات وقال لنا راعي الكداده يالله انزلوه هذي الغابات ولاتنسون شنطكم
الفصل الخامس نزلنا وأنا وراغب وتخبرون ماندل في الديار هذي عاد كملنا الطريق مشي داخل غابات الأمزون اليييين وصلنا قريه صغيره يقالها أم رنيو خشينا فيها على أساس نشوف لنا واحد دليله وأنا أمشي قال لي راغب على فكرة وأنت وش تبي فيذي الغابات قلت له أبد ياخوي راحين أجربع قال لي تمزح مع خشتك قلت جد والله قال لي ياأنك مضيعن وقتي فيذا على خرابيط الفاضيه قلت له والله ماحد غصبك تجي معي... المهم مشينا وقاعدين نخز في بعض وكل واحد وده يصفق الثاني بقسسسسسس .... والييين وصلنا للقريه ودخلناها وقاعدين نمشي ونلتفت ندور لنا احد وبعد مده شفنا واحد من بعيد على حدود القريه من الجهة الثانية وجينا عنده وهو قاعد يردد ساو باولو ساو باولو طلع كداده قال لي راغب وش هالديره كلها كداديه والله لو احنا على خط ابوحدريه ... عاد جيت عنده سلمت عليه وقلت له ياخوي ماتعرف قرية ماناوس قال كيف وطلع مايعرف عربي ... وكملت مشي واحنا ماغير نقطع بالأوراق والأشجار تقل طرزان متحمس ومشينا الييييين وصلنا لوحةمكتوب عليها الطريق غير نافذ وكاتبين بين قوسين قطوع قلت لراغب علامه ياولد نكمل ولانرجع قال والله مادري بس إذا تبي شوري دق على 902 واطلب خدمة تحديد المواقعGPS قلت والله جبتها يالذيب وطلعت العنيد 5 جوالي في ذيك الفتره وادق و طلع مافي ابراج قال راغب العن ابو الجوال لو ماخذن موبايلي كان اصرف لك قلت الله يستر الحال طيب الزبده وش السواة قال راغب توكل على الله ياخيي وابتل
الفصل السادس وعاد سيدنا واحنا في الطريق حصلنا عيال يلعبون كوره وأنا رايح له بسألهم عن ماناوس جاء واحدن منهم قال فريقنا ناقص لاعب تلعب معنا قلت أنت وين وأنا وين ياولد جاي أدور ماناوس ماتدله قال لي ايه بالله اعرفها قلت وينها الله يخليك قال ادلها بس بشرط وقلت وشو شرطك قال تلعب معنا عندنا مباره مهمه قلت والله لو هي على كأس العالم قال لي كيفك بس ماراح تعرف وين الديره قلت خلاص ابلعب بس حطني هجوم قال ابشر وجيب بعد خويك الفدغ خله لقاط كوره ولعبنا وسجلت هدفين واحد دبل واحد من فاول وفي نهاية المباراة انهزمنا عشرة -اثنين جيت عند خونا البرازيلي قلت يله الحين قول لي وين ماناوس قال شفت البقاله اللي دون هذي الشجرة بتحصل ماناوس على يمناك قلت الله يلعن ابليسك طلعت جبنا وطلعنا من عنده ورحنا أنا وخويي راغب علامه وجهة ماناوس
الفصل السابع وصلنا بالسلامه إلى ماناوس بعد تعب ووجعة الراس من المباراه الخايسة ودخلنا والديره ماهي كبير فيها محلات اعشاب وطب صيني ومن الشغلات هذي وماأكذب عليكم حصلت 3 فروع لستار بكس ومطعم شاورما وحلاق تركي وبعدين رحت أقرب محل أعشاب وقلت راعي المحل عندكم عرق سوس قال ايه نعم قلت له بالله جيب لنا 3 كيلو لاهنت قال ابشر ياحج (طلع مصري) جهز لي الطلب ومشيت من عنده وقال راغب وش عندك عرق سوس مره وحده قلت ايه والله عرق سوس الوالد موصي عرق سوس من الغابات عشان كذا أنا جيت فيذا قال راغب علامه يعني ماراح تجربع قلت مصدق انت مع وجهك صرفتها عليك وأنت على طول تصدق قال راغب والله داري انك ماعندك إلا الخرابيط بس ماأقول إلا حمار اللي يطلع معك مره ثانية قلت لاهين أنت حمار مايحتاج طلعة ثانية ...
الفصل الثامن رجعنا إلى المطار بنفس الكداده اللي جابنا هنا وقلت له الله لايهنيك اسرع اشوي قال لاتوصي حريص ودعس و خلال ساعة ونص إلا وحنا محضرين في المطار وبوجهنا وجه التيس رونالدو قال لنا ارحب بالذيابه قلت اللعن ابو صلعتك (ايام الصلعه) مانكبتنا إلا وجهك وجه النكبه قال افا وانا مضبط الكداده لكم قلت له طير مناك الديره كلها كداديه ... عاد صفطناه ومشينا وركبنا الطيارة وصلنا بدري الصراحة لأن ذاك اليوم كانت مباراة الهلال والنصر ومستعجل الطيار ويوم جينا وصلت خويي راغب علامه وقلت استر على ماوجهت قال ايه خير إن شاء الله بعدين دخلت البيت وسلمت على ابوي وعطيته العرق السوس وقلت هذا اللي طلبته من السوبر ماركت قال هذا وشو هذا ياولدي نعناع رح رجعه أنا يوم سمعت رح رجعه طحت غشيان لأن الكذاب حبله قصير
النهايــــــــــــة
ملاحظة راغب علامه ترى هو نفسه المغني اللبناني بس بغيتها مفاجأة لكم في النهاية <<<<< تصدق توقعت أنه هو
موضوع: في غابات الأمازون(قصة من ثمان فصول) 
الثلاثاء فبراير 12, 2008 7:03 pm
